Inflacioni në Kosovë ka arritur në 7.5 për qind, duke rënduar ndjeshëm jetën e qytetarëve, të cilët përballen me çmime të larta të produkteve bazë dhe shpenzimeve të përditshme. Banorët ankohen se pagat e ulëta nuk mjaftojnë për të përballuar shpenzimet, duke u detyruar shpeshherë të marrin para hua për të mbyllur muajin. Rritja më e madhe e çmimeve është regjistruar në sektorët e transportit, energjisë, ushqimit dhe shëndetësisë, ndërsa qytetarët kritikojnë mungesën e kontrollit nga institucionet shtetërore. Qeveria në detyrë ka miratuar një paketë ndihme prej 100 eurosh për pensionistët, fëmijët dhe studentët, por kjo masë është cilësuar nga analistët dhe opozita si e pamjaftueshme dhe e motivuar politikisht në prag të zgjedhjeve.