Në konferencën jubilare të Odës Ekonomike të Maqedonisë Veri-Perëndimore (OEMVP), eksperti ekonomik Izet Zeqiri theksoi se migrimi i vazhdueshëm dhe mungesa e fuqisë punëtore janë sfidat kryesore që po ndikojnë në krizën demografike të vendit. Ai nënvizoi se numri i lindjeve po bie, ndërsa vdekjet mbeten më të larta, duke krijuar një rritje natyrore negative të popullsisë. Kryetari i OEMVP-së, Nuhi Aliu, theksoi rëndësinë e bashkëpunimit për të projektuar të ardhmen e biznesit dhe zhvillimit ekonomik, duke vlerësuar kontributin e odës në përmirësimin e klimës së biznesit dhe dialogun publiko-privat. Zëvendëskryeministri i parë, Bekim Sali, u shpreh se në një kohë ndryshimesh të shpejta ekonomike dhe teknologjike, ekonomitë e suksesshme janë ato që investojnë në inovacion dhe kapital njerëzor, ndërsa odat ekonomike duhet të vazhdojnë të jenë partnerë aktivë në politikëbërje dhe nxitjen e investimeve.