Kryeprokurori i Prokurorisë Themelore në Prizren, Petrit Kryeziu, priti përfaqësuesit e Departamentit të Thesarit të Shteteve të Bashkuara të Amerikës në një takim pune të fokusuar në luftën kundër pastrimit të parave dhe krimeve financiare. Gjatë takimit u diskutua për forcimin e bashkëpunimit ndërinstitucional, identifikimin dhe hetimin e veprave penale financiare, si dhe për avancimin e mekanizmave për adresimin e formave të sofistikuara të kriminalitetit ekonomik. Kryeprokurori vlerësoi mbështetjen e vazhdueshme të Ambasadës Amerikane dhe theksoi rëndësinë e shkëmbimit të praktikave më të mira ndërkombëtare për të forcuar sundimin e ligjit dhe integritetin financiar. Nga ana e tyre, përfaqësuesit amerikanë shprehën gatishmërinë për të vazhduar bashkëpunimin me institucionet e drejtësisë në Kosovë, duke synuar parandalimin, hetimin dhe ndjekjen efektive të këtyre veprave penale.