Njësia e Krimeve Kibernetike në Prishtinë ka goditur një grup të organizuar kriminal që mashtronte qindra qytetarë përmes mesazheve të rreme SMS, duke u paraqitur në emër të Policisë së Kosovës, bankave, Administratës Tatimore dhe platformës e-Kosova. Në kuadër të operacionit janë arrestuar dy persona, Angel Ognyanov Ralchev dhe Florian Hoti, të cilëve u janë caktuar masa paraburgimi dhe ndalimi, ndërsa gjatë kontrolleve janë sekuestruar telefona, kartela SIM, kartela bankare dhe pajisje teknologjike që lidhen me aktivitetin kriminal. Hetimet zbulojnë se përmes këtyre mesazheve mashtruese viktimat jepnin të dhënat e kartelave bankare, të cilat më pas përdoren për transferime, tërheqje dhe blerje pa autorizim, me mbi 150 raste të identifikuara vetëm në rajonin e Prishtinës. Autoritetet po vazhdojnë veprimet intensive për të lokalizuar dhe arrestuar pjesëtarët e tjerë të këtij grupi të strukturuar, duke theksuar rëndësinë e luftës kundër mashtrimeve kibernetike në vend.