Katër persona, përfshirë pronarin e një lokali nate në Berat, truproja, menaxherin dhe kamerierin, janë dënuar për prodhim dhe shitje të narkotikëve në bashkëpunim. Hetimet zbuluan se në lokal, i quajtur “Star Club”, klientët pas konsumimit të alkoolit kërkonin dhe konsumonin kokainë, e cila ishte fshehur në blloqet e murit rrethues dhe ndahej në doza të vogla për shitje. Të pandehurit përdornin kodin “amaro” për të fshehur aktivitetin e tyre dhe bashkëpunonin ngushtë në shpërndarjen e drogës, ku pronari ishte organizatori kryesor, ndërsa stafi ndihmonte në realizimin e veprimeve kriminale. Gjykata e Shkallës së Parë të Juridiksionit të Përgjithshëm në Berat i dënoi ata me burgime nga 4 vjet e 8 muaj deri në 8 vite, duke vlerësuar provat e shumta dhe blerjet e simuluara që konfirmuan aktivitetin e paligjshëm.