Bojan Jevtiq, shefi i operativës së Policisë së Kosovës në pikën “Dheu i Bardhë”, është dënuar me gjashtë vjet burg dhe 2000 euro gjobë për spiunazh dhe armëmbajtje pa leje. Ai ka pranuar se që nga viti 2009 kishte kontratë paralelisht me Ministrinë e Punëve të Brendshme të Serbisë, si pjesëtar i Policisë së Serbisë dhe rezervist i Ushtrisë së këtij vendi. Gjatë bastisjes së shtëpisë së tij janë gjetur dokumente që dëshmojnë lidhjet e tij me strukturat serbe, përfshirë një padi kundër institucioneve të Kosovës dhe një certifikatë që e lidh me Ushtrinë serbe. Hetimet kanë zbuluar se Jevtiq ka dërguar informacione konfidenciale për operacionet e Policisë së Kosovës dhe ka qenë në kontakt me agjentë të BIA-s serbe, duke kompromentuar sigurinë e institucioneve kosovare.