Gjatë një turi kulturor në Prizren, një turistë japoneze është rrëzuar dhe ka pësuar lëndime në kokë dhe dorë pas përplasjes me një qen endacak që po ndiqte një mace. Ngjarja ka ndodhur menjëherë pas vizitës në Muzeun Gazi Mehmet Pasha dhe turistja është trajtuar në emergjencë, ku u konstatua se kishte hematomë dhe lëndime sipërfaqësore, por pa fraktura. Pronari i operatorit turistik “Balkan Destination” ka ngritur shqetësimin për rritjen e qenve endacakë dhe mungesën e pastërtisë në hapësirat publike, duke theksuar se kjo situatë po dëmton imazhin turistik të Kosovës. Kompania kërkon masa urgjente nga institucionet për menaxhimin e qenve endacakë dhe përmirësimin e sigurisë dhe pastërtisë në zonat urbane dhe turistike, ndërsa institucionet ende nuk kanë reaguar publikisht.