Komandanti i Forcës së Sigurisë së Kosovës, Gjenerallejtënant Bashkim Jashari, priti në takim Zëvendës Adjutantin dhe udhëheqësin e Gardës Ajrore të Gardës Kombëtare të Ajovës, Gjeneral Brigade Mark A. Muckey, për të diskutuar bashkëpunimin e vazhdueshëm mes dy institucioneve. Gjeneral Jashari falënderoi për mbështetjen e dhënë në zhvillimin e kapaciteteve të FSK-së dhe e përshkroi partneritetin si një histori suksesi, duke theksuar rolin kyç të forcës në garantimin e sigurisë dhe stabilitetit rajonal. Nga ana e tij, Gjeneral Muckey përgëzoi lidershipin dhe arritjet e FSK-së, duke shprehur gatishmërinë për të vazhduar mbështetjen në avancimin e mbrojtjes së hapësirës ajrore. Të dy gjeneralët riafirmuan përkushtimin për thellimin e bashkëpunimit strategjik, duke e konsideruar forcimin e kapaciteteve mbrojtëse të Kosovës si një faktor kyç për paqen dhe stabilitetin në rajon.