Para zgjedhjeve të jashtëzakonshme parlamentare në Kosovë më 7 qershor, platforma Hibrid.info ka ngritur shqetësimin për përdorimin e inteligjencës artificiale dhe videove të manipuluara, të njohura si deepfake, që mund të ndikojnë në opinionin publik dhe të minojnë besimin ndaj mediave kredibile. Hulumtuesi Etrit Rexhepi thekson se këto video shpërndahen si Vox Pop-a autentikë dhe imitojnë mediat vendore me qëllim manipulimin e perceptimit të qytetarëve për subjektet politike në garë. Ai paralajmëron se përmbajtjet e tilla janë në rritje gjatë periudhës zgjedhore dhe përbëjnë një kërcënim serioz për proceset demokratike në vend. Sipas Rexhepit, një pjesë e madhe e qytetarëve nuk arrijnë ende të dallojnë mes përmbajtjeve autentike dhe atyre të manipuluara, duke rritur rrezikun e keqinformimit masiv.