Në një analizë të publikuar nga gazeta gjermane “Frankfurter Allgemeine Zeitung”, Shaip Kamberi, deputet shqiptar në parlamentin serb, kritikon ashpër riprodhimin e narrativave nacionaliste brenda lëvizjes studentore në Serbi. Ai thekson se demokratizimi i vendit nuk mund të bazohet në modele të vjetra nacionaliste, edhe kur ato shfaqen me një paketim politik të ri, duke paralajmëruar se kompromiset me nacionalizmin sjellin krizë dhe paqëndrueshmëri afatgjatë. Kamberi nënvizon mungesën e ballafaqimit me të kaluarën dhe përfshirjen e pakicave, veçanërisht shqiptarëve të Luginës së Preshevës, në agjendën e protestave, si dhe mungesën e njohjes së krimeve të luftës nga brezi i ri studentor serb. Ai ngre pyetjen nëse lëvizja studentore synon vetëm ndryshim pushteti apo një ndryshim të thellë demokratik, duke kërkuar një shkëputje të qartë nga ideologjitë që kanë prodhuar konflikte dhe diskriminim në rajon.