Shtetet e Bashkuara të Amerikës po i kërkojnë hapur Kosovës që t’i bashkohet projektit amerikan të tubacionit për marrjen e gazit natyror të lëngshëm (LNG), duke theksuar rëndësinë e diversifikimit të burimeve të energjisë në vend. Ambasada amerikane nënvizon se Kosova aktualisht nuk prodhon energji të mjaftueshme për të përmbushur kërkesat e brendshme dhe se përdorimi i teknologjisë amerikane për gazifikimin e qymyrit dhe burimeve të rinovueshme është pjesë e mbështetjes së tyre. Sipas zyrtarëve amerikanë, diversifikimi i burimeve energjetike nuk është vetëm një çështje teknike, por një element kyç për sigurinë energjetike të Kosovës dhe për zvogëlimin e varësisë nga importet e shtrenjta të energjisë elektrike. Ambasada thekson se Kosova duhet të ketë në dispozicion mundësi të shumta dhe të besueshme për të përballuar rritjen e kërkesës në të ardhmen dhe për të siguruar stabilitet energjetik.