Qytetarët e Prishtinës vazhdojnë të marrin shumicën e shërbimeve spitalore në Qendrën Klinike Universitare të Kosovës, duke shkaktuar ngarkesë të madhe në këtë institucion. Projekti për ndërtimin e Spitalit të Prishtinës, i cili synon të lehtësojë këtë ngarkesë dhe t'u ofrojë kryeqytetasve një institucion të dedikuar shëndetësor, ka hasur pengesa të mëdha, përfshirë bllokimin nga Ministria e Punëve të Brendshme dhe Administratës Publike. Kryetari i Prishtinës, Përparim Rama, ka bërë të ditur se tashmë janë përcaktuar lokacioni dhe buxheti për spitalin, ndërsa po zhvillohen bisedime me investitorë privatë dhe institucione financiare ndërkombëtare për financimin e projektit. Ndërtimi i këtij spitali, me një kosto të parashikuar prej 90 milionë eurosh në zonën e Prishtinës së Re, pritet të ulë ndjeshëm ngarkesën në QKUK dhe të përmirësojë shërbimet shëndetësore për qytetarët e kryeqytetit.