Festimet për Ditën e Evropës në Kosovë, të cilat u zhvilluan gjatë gjithë muajit maj, u përmbyllën me një ecje malore në shtigjet e Rugovës. Ky aktivitet u organizua nga Bashkimi Evropian në Kosovë në bashkëpunim me Balkan Natural Adventure dhe ofroi mundësinë për të përjetuar peizazhet natyrore dhe trashëgiminë kulturore të zonës. Ecja promovoi vlerat e jetesës së shëndetshme, kujdesin për mjedisin dhe lidhjen e natyrës me jetën urbane, duke inkurajuar njerëzit të përdorin shtigjet e mbështetura nga BE-ja pa nevojën e veturës. Bashkimi Evropian vazhdon të mbështesë turizmin e qëndrueshëm dhe ruajtjen e mjedisit në Kosovë, ndërsa ky aktivitet shënoi edhe përmbylljen e programit të festimeve për Ditën e Evropës.