Një delegacion i Kongresit të SHBA-së, i udhëhequr nga Keith Self, kryetar i Nënkomitetit për Evropën në Komisionin për Punë të Jashtme, vizitoi Luginën e Preshevës, duke dërguar një mesazh të rëndësishëm për shqiptarët në Preshevë, Medvegjë dhe Bujanoc. Veprimtari shqiptaro-amerikan Harry Bajraktari e cilësoi këtë vizitë si historike dhe theksoi se ajo tregon se shqiptarët në këtë rajon nuk janë harruar dhe zëri i tyre dëgjohet në Washington. Ai vuri në dukje rëndësinë e vizitës për ruajtjen e paqes, stabilitetit dhe avancimin e të drejtave të shqiptarëve në Ballkan, duke falënderuar gjithashtu Kongresin amerikan dhe komunitetin shqiptaro-amerikan në Texas për mbështetjen e vazhdueshme. Kjo vizitë vazhdon traditën e mikut të shqiptarëve, Eliot Engel, duke forcuar lidhjet dhe shpresat për të ardhmen demokratike në rajon.