Përgatitjet për Lojërat Mesdhetare “Prishtina 2030” kanë hyrë në një fazë vendimtare pas miratimit të ligjit në Kuvendin e Kosovës dhe intensifikimit të takimeve mes palëve të përfshira. Komisioni Koordinues i Komitetit Ndërkombëtar të Lojërave Mesdhetare zhvilloi takime në Durrës, bashkëorganizator i sporteve të lundrimit, ku u diskutuan bashkëpunimet me institucionet shqiptare dhe u konfirmua se procesi po ecën në drejtimin e duhur. Megjithatë, shqetësim mbetet situata politike në Kosovë, e cila mund të ndikojë në vonesa të ndërtimit të infrastrukturës sportive, përfshirë Stadiumin Kombëtar, i cili duhet të jetë gati deri në vitin 2029. Një tjetër zhvillim i rëndësishëm është pritja e vendimit për logos zyrtare të Lojërave, ndërsa në Londër u zhvillua një vizitë studimore për të marrë modele të qëndrueshmërisë së objekteve sportive pas eventit.