Samadrexha ka bërë një rikthim të jashtëzakonshëm në finalen e plejofit të Superligës së Kosovës në hendboll për femra, duke barazuar serinë ndaj Shqiponjës në 2:2. Pas dy fitoreve të Shqiponjës në ndeshjet e para, Samadrexha u përgjigj me dy suksese radhazi, duke fituar ndeshjen e katërt me rezultatin 24:20 në palestrën “Shani Nushi” në Gjakovë. Në këtë përballje, Vitoria Oliveira u dallua si lojtare më efikase e Samadrexhës me shtatë gola, ndërsa te Shqiponja më e mirë ishte Alma Nivokazi me pesë gola. Tani gjithçka do të vendoset në finalen e pestë dhe vendimtare, që do të zhvillohet në Samadrexhë, ku do të përcaktohet kampionia e re e Kosovës në hendboll.