Marrëdhëniet midis dy gjigantëve të futbollit spanjoll, Barcelona dhe Real Madrid, janë përkeqësuar ndjeshëm, duke kaluar nga fushat sportive në ato ligjore. Barcelona po përgatit një padi ndaj Real Madridit dhe presidentit të tij, Florentino Perez, pas akuzave të fundit që lidhen me rastin “Negreira” dhe pretendimet për ndihmë të paligjshme në gjyqtarë. Presidenti i përkohshëm i Barcelonës, Rafa Yuste, ka reaguar ashpër ndaj këtyre sulmeve, duke i cilësuar si shpifje dhe përpjekje për të njollosur emrin dhe historinë e klubit katalanas. Ai ka paralajmëruar se departamenti ligjor i Barcelonës është gati për veprime, ndërsa thekson se këto sulme tregojnë më shumë xhelozi sesa zemërim, duke nënvizuar se askush nuk mund të njollosë stemën e klubit.