Udhëheqësja për Politikë të Jashtme në median estoneze “Postimees”, Evelyn Kaldoja, theksoi rëndësinë e Samitit të NATO-s në Ankara për të vlerësuar nëse aleatët do të ruajnë unitetin dhe do t’i kthejnë premtimet në veprime konkrete. Ajo vuri në dukje se për Evropën është thelbësore që të mos ketë luhatje në unitetin e aleatëve, sidomos në sfidat e sigurisë që vijnë nga lufta në Ukrainë dhe kërcënimi rus. Një nga çështjet kryesore do të jetë nëse vendet anëtare kanë nisur realisht të rrisin shpenzimet e mbrojtjes drejt objektivit prej 5 për qind, si dhe fuqizimi i industrisë së mbrojtjes përmes porosive konkrete nga shtetet. Kaldoja theksoi se NATO mbetet një shtyllë e fuqishme në mbështetje të mbrojtjes së Ukrainës dhe frenimin e ambicieve ruse, duke shpresuar që parandalimi i aleancës të funksionojë në mënyrë efektive.