Gërmimet në Kalludër të Vogël zbulojnë mbetje mortore dhe municion nga lufta, hetimet vazhdojnë

Në fshatin Kalludër e Vogël të Zubin Potokut, gjatë gërmimeve të zhvilluara për të katërtën ditë me radhë, janë zbuluar mbetje mortore që dyshohet të jenë pjesë e një varreze masive nga lufta e fundit në Kosovë. Identifikimi i këtyre mbetjeve do të bëhet vetëm pas përfundimit të ekzaminimeve mjeko-ligjore dhe analizave të ADN-së, ndërsa dyshohet se mund të jenë mbetjet e “intelektualëve nga Mitrovica” të zhdukur që nga prilli i vitit 1999. Gërmimet po kryhen nga Instituti i Mjekësisë Ligjore, Policia e Kosovës dhe institucione të tjera kompetente, nën mbikëqyrjen e Prokurorisë Speciale, e cila kërkon kujdes në deklaratat publike për të mos dëmtuar procesin hetimor. Kryeprokurori Blerim Isufaj ka theksuar se procesi i identifikimit kërkon kohë dhe profesionalizëm, ndërsa punimet do të vazhdojnë deri në përfundimin e të gjitha procedurave të nevojshme.