Çmimet e naftës ranë ndjeshëm pas raportimeve se Shtetet e Bashkuara dhe Irani janë shumë pranë një marrëveshjeje për të dhënë fund luftës mes tyre. Në bursën “Brent”, çmimi i naftës së papërpunuar u ul nga mbi 108 dollarë në 97 dollarë, për t’u stabilizuar më pas rreth 101 dollarë. Në të njëjtën kohë, tregjet globale të aksioneve shënuan rritje të ndjeshme, me indekset kryesore europiane dhe amerikane që u ngritën mbi 1-3 për qind. Kjo lëvizje pozitive erdhi pas raportimit të mediumit amerikan “Axios” se SHBA-ja është afër nënshkrimit të një dokumenti njëfaqësh, që do të hapë rrugën për bisedime më të thella bërthamore dhe përfundimin e konfliktit.