Aktivisti shqiptar Baki Goxhaj, i ndaluar nga autoritetet izraelite gjatë pjesëmarrjes në flotiljen “Global Sumud”, është tashmë në rrugë për t’u kthyer në Shqipëri. Ministri për Evropën dhe Punët e Jashtme, Ferit Hoxha, njoftoi se strukturat e Shërbimit të Jashtëm shqiptar kanë ndjekur rastin që nga momenti i parë, duke bashkëpunuar ngushtë me autoritetet izraelite dhe institucionet shqiptare për të garantuar respektimin e të drejtave të tij. Shqipëria ka kërkuar vazhdimisht respektimin e plotë të të drejtave të shtetasit shqiptar në përputhje me të drejtën ndërkombëtare dhe normat humanitare, duke kundërshtuar çdo trajtim të papranueshëm. Ky rast tregon përkushtimin e vazhdueshëm dhe profesionalizmin e Shërbimit të Jashtëm dhe përfaqësive diplomatike shqiptare në mbrojtje të qytetarëve në çdo situatë.