Ambasada e Shteteve të Bashkuara në Tiranë ka lëshuar një njoftim të rëndësishëm sigurie, duke paralajmëruar qytetarët amerikanë për rritjen e kërcënimeve nga grupet mbështetëse të Iranit. Sipas njoftimit, këto grupe mund të synojnë interesa amerikane jo vetëm në Lindjen e Mesme, por edhe në vende të tjera jashtë territorit amerikan, përfshirë partnerët dhe qytetarët amerikanë në mbarë botën. Ambasada u bën thirrje amerikanëve jashtë vendit të ndjekin me kujdes udhëzimet e sigurisë të lëshuara nga ambasadat dhe konsullatat më të afërta, duke theksuar gjithashtu mundësinë e ndërprerjeve në udhëtime për shkak të mbylljeve periodike të hapësirës ajrore. Ky paralajmërim vjen në një kohë kur tensionet në Lindjen e Mesme po përshkallëzohen dhe Irani ka shprehur gatishmërinë për hakmarrje ndaj interesave amerikane.