Ambasada e Shteteve të Bashkuara në Tiranë ka lëshuar një paralajmërim për qytetarët amerikanë, duke u kërkuar atyre të tregojnë kujdes të shtuar pas përshkallëzimit të konfliktit midis SHBA-së dhe Iranit në ditët e fundit. Në një njoftim zyrtar në Facebook, ambasada thekson rëndësinë e ndjekjes së udhëzimeve të konsullatave dhe paralajmëron për mundësinë e pezullimeve të fluturimeve për shkak të mbylljeve periodike të hapësirës ajrore. Departamenti i Shtetit këshillon amerikanët në mbarë botën, veçanërisht në Lindjen e Mesme, të jenë të kujdesshëm dhe të ndjekin me vëmendje njoftimet e sigurisë të lëshuara nga ambasada ose konsullatat më të afërta. Ky paralajmërim vjen pas nisjes së operacioneve luftarake të SHBA-së në Iran, duke rritur shqetësimet për sigurinë dhe ndërprerjet në udhëtime.