Një zjarr i madh shpërtheu mëngjesin e sotëm në juglindje të Athinës, në rajonin e Atikës, duke përfshirë zonën e Kouvarasit, rreth 60 kilometra larg kryeqytetit grek. Erërat e forta me shpejtësi mbi 70 km/orë po favorizojnë përhapjen e flakëve, duke vështirësuar punën e 172 zjarrfikësve dhe rreth 40 automjeteve të angazhuara në operacion. Ndihmë nga ajri po ofrohet nga dy avionë zjarrfikës dhe katër helikopterë, ndërsa autoritetet kanë urdhëruar evakuimin e fshatit Agios Stylianos për shkak të rrezikut të përhapjes së zjarrit. Kjo është vatra e dytë e madhe e zjarrit pranë Athinës gjatë kësaj vere, duke rritur shqetësimet për situatën e sigurisë në rajon.