Ish-presidentja e Kosovës, Atifete Jahjaga, po merr pjesë në sesionin e 70-të të Komisionit për Statusin e Grave të OKB-së në Nju-Jork, si anëtarja e vetme nga rajoni në Rrjetin e Grave Lidere të Kombeve të Bashkuara. Ajo ka marrë pjesë në panele të nivelit të lartë ku ka diskutuar rolin e grave në pozita udhëheqëse dhe rëndësinë e tyre në avancimin e drejtësisë për gratë dhe vajzat. Jahjaga ka theksuar se gratë në pozita vendimmarrëse mund të nxisin politika më gjithëpërfshirëse dhe institucione më të ndjeshme ndaj nevojave të shoqërisë. Gjithashtu, ajo ka ndarë përvojën e saj në avokimin për drejtësi për të mbijetuarit e dhunës seksuale gjatë luftës në Kosovë, duke vënë në dukje nevojën për hapësira të sigurta dhe mekanizma institucionalë të fuqishëm për mbrojtjen dhe mbështetjen e tyre.