Mitch Winehouse, babai i këngëtares së ndjerë Amy Winehouse, humbi një proces gjyqësor në Mbretërinë e Bashkuar dhe është urdhëruar të paguajë rreth 950 mijë paund (rreth 1.1 milion euro) dy mikeshave të vajzës së tij. Ai i kishte paditur ish-stilisten Naomi Parry dhe mikeshën Catriona Gourley, duke i akuzuar për shitjen pa autorizim të rrobave dhe sendeve personale të Amy Winehouse gjatë periudhës nëntor 2021-maj 2023. Objekte të ndryshme, përfshirë një fustan nga turneu i fundit i këngëtares, çanta dhe bizhuteri, u shitën në ankand që gjeneroi rreth 1.4 milion dollarë. Gjykatësja Sarah Clarke vendosi në favor të dy grave, duke konstatuar se ato nuk kishin fshehur shitjen dhe se Mitch Winehouse kishte qenë në dijeni të ankandit.