Në Berlin është zbuluar një bombë e Luftës së Dytë Botërore në fundin e një kanali në lagjen Neukölln, pranë rrugës së njohur Sonnenallee. Autoritetet kanë urdhëruar evakuimin e 5600 banesave në një perimetër sigurie prej 500 metrash, ku përfshihen edhe një shtëpi të moshuarish, një qendër për të pastrehët dhe një çerdhe. Bomba, me peshë rreth 100 kilogramë, u nxor nga uji dhe u vendos në një platformë lundruese për t’u transportuar me vinç drejt bregut, ku ekspertët do të kryejnë çaktivizimin e saj. Operacioni i evakuimit po vazhdon dhe autoritetet kanë siguruar ambiente të përkohshme për banorët e prekur deri në përfundimin e procedurave të sigurisë.