Më 12 shtator në Bukuresht u organizua ngjarja “Masa care unește” – “Tryeza që bashkon”, ku u vendos rekordi botëror për tryezën më të gjatë të ndërtuar nga materiale të riciklueshme, me gjatësi 5.055 metra. Rreth 20 mijë njerëz u ulën rreth saj dhe u shërbyen më shumë se pesë tonë ushqime tradicionale rumune, duke krijuar një atmosferë të veçantë në qendër të kryeqytetit. Ngjarja kishte një qëllim humanitar, pasi fondet e mbledhura do të përdoren për ndërtimin e spitalit të parë të psikiatrisë pediatrike në Rumani, një projekt me vlerë rreth 16.5 milionë euro që pritet të përfundojë në vitin 2027. Kjo iniciativë vjen në një kohë kur rastet e problemeve të shëndetit mendor te të rinjtë rumunë janë rritur ndjeshëm, duke bërë të domosdoshme ndërtimin e këtij institucioni të specializuar.