Përfaqësuesja e Danimarkës në Këshillin e Sigurimit të OKB-së, Christina Markus Lassen, ka kërkuar që Serbia të ndalojë pengesat ndaj Kosovës në rrugën e saj drejt anëtarësimit në organizata ndërkombëtare. Ajo theksoi rëndësinë e zbatimit të marrëveshjeve ekzistuese me mirëbesim dhe kërkoi hapa konkretë nga pala serbe për të siguruar drejtësi, duke i sjellë para drejtësisë përgjegjësit e sulmit në Banjskë. Lassen vuri në dukje se kjo çështje vazhdon të ndikojë negativisht në marrëdhëniet ndërmjet dy vendeve dhe nënvizoi nevojën për llogaridhënie. Gjithashtu, ajo inkurajoi mbajtjen e një takimi të nivelit të lartë ndërmjet Kosovës dhe Serbisë për të avancuar dialogun dhe për të arritur rezultate konkrete në procesin e normalizimit.