Një libër investigativ i publikuar së fundmi në Itali zbulon një rrjet të organizuar që dërgonte italianë të pasur në Bosnje për të qëlluar civilë gjatë rrethimit të Sarajevo, duke përfshirë edhe fëmijë si objektiva kryesore. Udhëtimet organizoheshin përmes një agjencie në Milano dhe pjesëmarrësit paguanin shuma të mëdha për të marrë pjesë në këto “safari” makabre, ku snajperistët ktheheshin me gëzhoja të ngjyrosura sipas kategorisë së viktimave. Hetimet po zhvillohen nga prokuroria në Milano dhe kanë përfshirë edhe qytete të tjera italiane si Parma dhe Trieste, ndërsa dyshohet për lidhje me trafik droge dhe përdorimin e automjeteve të maskuara si mjete humanitare. Komunikimi brenda rrjetit ishte i koduar dhe pjesëmarrja bëhej vetëm me ftesë, ndërsa një nga mesazhet sinjalizuese ishte “Ka drerë për gjuetarët”, ku “drerët” ishin civilët dhe “gjuetarët” snajperistët.