Dragoljub Kunarac, kriminel lufte serb nga Bosnja dhe Hercegovina, i dënuar nga Tribunali i Hagës me 28 vjet burg për përdhunime dhe krime të tjera në vitin 1992, është dorëzuar autoriteteve të Bosnjë e Hercegovinës për t’u gjykuar sërish. Ai do të përballet me akuza të reja për krime lufte në rajonin e Foçës, përfshirë vrasjen e të paktën gjashtë civilëve boshnjakë, tortura, deportim dhe shkatërrim prone, të cilat nuk ishin përfshirë në gjykimin e mëparshëm në Hagë. Kunarac ishte komandant i njësisë speciale “Zhaga” të Ushtrisë së Republikës Serbe dhe ishte i pari i dënuar nga Tribunali i Hagës për përdhunim dhe torturim të grave boshnjake. Krimet e tij përbënin pjesë të persekutimit dhe pastrimit etnik ndaj popullsisë boshnjake gjatë luftës në Bosnjë Lindore në vitin 1992.