Në muajin qershor, dy persona u arrestuan në kufirin mes Serbisë dhe Hungarisë dhe aktualisht janë nën hetim për mbajtje dhe bartje të paligjshme të armëve, municionit dhe materialeve shpërthyese. Prokuroria e Lartë Publike në Suboticë ka lëshuar urdhër për hetimin e tyre, duke përfshirë edhe dyshimet për falsifikim dokumentesh në rastin e njërit prej tyre. Gazeta gjermane Bild i ka lidhur këta persona me shërbimin sekret rus, duke raportuar se ata dyshohet se po planifikonin një sulm me eksploziv në Gjermani, me një objektiv të mundshëm të lidhur me prodhimin ose furnizimin e pajisjeve ushtarake për Ukrainën.