Një ngjarje e rëndë tronditi festivalin “Aarau Rave” në Zvicër, ku një 22-vjeçare italiane, Maria S., u qëllua për vdekje rreth orës 02:30 të së dielës. Maria ishte zhvendosur në Zvicër vetëm një muaj më parë për të ndërtuar një jetë të re dhe kishte gjetur punë si kameriere, ndërsa planifikonte të vazhdonte studimet jashtë vendit. Policia Kantonale e Aargaut konfirmoi se ajo ishte viktimë e rastësishme e të shtënave me armë zjarri gjatë përfundimit të festivalit, ku përveç saj, u plagosën edhe pesë persona të tjerë. Kryeministrja italiane, Giorgia Meloni, i shprehu ngushëllimet familjes së viktimës, duke theksuar dhimbjen për humbjen e një jete të re dhe të premtuar.