Presidenti turk Recep Tayyip Erdogan ka deklaruar se sulmet e Izraelit ndaj Sirisë dhe Libanit kanë arritur një nivel ku kërcënojnë edhe sigurinë e Turqisë, duke e konsideruar agresionin izraelit një rrezik për stabilitetin rajonal dhe botëror. Ai ka theksuar se siguria e Ankarasë është e lidhur ngushtë me atë të vendeve fqinje dhe ka paralajmëruar se çdo shkelje e të drejtave të Turqisë dhe turko-qipriotëve në Mesdheun Lindor do të marrë një përgjigje të fortë. Erdogan gjithashtu ka akuzuar Izraelin për përpjekje të fshehta për destabilizimin e vendeve afrikane dhe Mesdheut, duke kërkuar nga komuniteti ndërkombëtar të ndërmarrë masa kundër këtij agresioni. Ai ka bërë thirrje për rikthimin e Izraelit brenda kufijve të sundimit të ligjit, duke theksuar se heshtja ndërkombëtare po e fuqizon shtetin izraelit në veprimet e tij.