Presidenti turk Recep Tayyip Erdogan ka paralajmëruar se uji mund të bëhet shkak i konflikteve globale, ashtu siç ka qenë nafta në të kaluarën. Ai theksoi rëndësinë e menaxhimit të kujdesshëm të burimeve ujore në Turqi, duke theksuar se lufta për ujin do të intensifikohet në shekullin e ardhshëm për shkak të ndryshimeve klimatike, rritjes së popullsisë dhe urbanizimit të shpejtë. Erdogan rikujtoi se Turqia ka një mesatare vjetore reshjesh shumë më të ulët se mesatarja globale, gjë që e detyron vendin të përdorë ujin në mënyrë racionale dhe të mbrojë burimet e tij. Ai gjithashtu bëri thirrje për një qasje të përgjegjshme ndaj ujit, duke theksuar se aktualisht 2.2 miliardë njerëz në botë nuk kanë qasje të sigurt në ujë të pijshëm dhe se deri në vitin 2050 kjo situatë do të përkeqësohet ndjeshëm.