Qindra familje në Francë kanë ngritur një padi kolektive kundër TikTok-ut, duke e akuzuar platformën për shfrytëzim të dobësisë së të miturve dhe ndikim të rëndë në shëndetin mendor të adoleshentëve. Sipas padisë, algoritmet e TikTok-ut krijojnë varësi, ankth dhe depresion, duke nxitur në raste të rënda edhe vetëvrasje, ndërsa drejtuesit e platformës nuk kanë marrë masa për të kufizuar këto dëme. Avokatja që përfaqëson familjet thekson se TikTok është projektuar për të mbajtur përdoruesit të lidhur gjatë, duke krijuar “burgje mendore” dhe gjendje të vazhdueshme ankthi. Kjo çështje ka rihapur debatin në Francë për rregullimin e mediave sociale dhe mbrojtjen e të miturve, duke përfshirë propozime për ndalimin e përdorimit të rrjeteve sociale nga fëmijët nën 15 vjeç.