Një zjarr i madh ka përfshirë zonën pranë liqenit Garda në veri të Italisë, duke detyruar evakuimin e më shumë se 200 personave, përfshirë dhjetëra turistë nga resortet pranë bregut perëndimor të liqenit. Flakët u përhapën me shpejtësi gjatë mbrëmjes dhe natës në zonat malore të komunës Tignale, ndërsa zjarrfikësit vazhdojnë përpjekjet për t’i vënë zjarrin nën kontroll, duke përdorur edhe avionë dhe helikopterë zjarrfikës. Autoritetet po përqendrohen në frenimin e vatrave dhe mbrojtjen e ndërtesave të banimit, ndërsa nuk raportohet për të lënduar deri tani. Italia po përballet me një valë të gjatë të të nxehtit ekstrem, me temperatura që kalojnë 40 gradë Celsius, duke vështirësuar situatën dhe duke rritur rrezikun nga zjarret në gjithë vendin.