Zjarret në perëndim të Athinës janë përhapur në mënyrë shqetësuese, duke përfshirë më shumë se 70 zona në gjithë Greqinë. Rreth 500 zjarrfikës dhe vullnetarë, të mbështetur edhe nga forca ndërkombëtare, po luftojnë me flakët, por erërat e forta deri në 130 km/orë po e bëjnë shuarjen thuajse të pamundur. Vatrat më të mëdha ndodhen rreth 60 kilometra në perëndim të Athinës dhe po përparojnë drejt qytetit të Megarës, ndërsa disa zona të banuara janë evakuuar për shkak të rrezikut. Deri tani raportohet për dëme të mëdha, përfshirë shkatërrimin e mijëra hektarëve tokë dhe deri në 200 shtëpi, ndërsa autoritetet kanë arrestuar 13 persona për dyshim shkaktimi zjarri nga pakujdesia.