Një valë e fuqishme zjarresh ka përfshirë disa zona të Greqisë, me situatën më kritike në Porto Germeno, Atikën Perëndimore, ku flakët po përhapen me shpejtësi dhe kanë dëmtuar mbi 100 banesa. Autoritetet kanë urdhëruar evakuimin e banorëve në disa fshatra përreth, duke përdorur sistemin emergjent 112 dhe duke drejtuar njerëzit drejt Megarës për siguri. Erërat e forta kanë vështirësuar ndjeshëm ndërhyrjen ajrore, megjithëse janë angazhuar mbi 450 zjarrfikës dhe 126 mjete, si dhe ekipe mbështetëse nga Franca dhe Rumania. Përveç Porto Germenos, zjarre aktive janë regjistruar edhe në Fokidë, Beoti dhe Aigialeia, ndërsa autoritetet paralajmërojnë për kushtet ekstreme meteorologjike dhe kërkojnë kujdes maksimal nga qytetarët.