Franca ka thirrur të ngarkuarin me punë të Ambasadës së Rusisë në Paris për të dënuar aktivitetet kibernetike që dyshohet se janë kryer nga agjentë rusë dhe që synojnë territorin francez. Ministria e Jashtme franceze e ka cilësuar këtë veprim si një përgjigje ndaj sulmeve “dashakeqe” të kryera nga Qendra e 16-të e Shërbimit Federal të Sigurisë së Rusisë (FSB), duke theksuar se këto sulme kanë prekur edhe disa partnerë evropianë. Franca ka përcjellë mesazhin e saj të fortë diplomatik, duke e konsideruar këtë sjellje të papranueshme për një anëtare të përhershme të Këshillit të Sigurimit të OKB-së. Ajo ka nënvizuar vendosmërinë e saj dhe të partnerëve për të përdorur të gjitha mjetet ligjore dhe diplomatike për të parandaluar dhe kundërshtuar veprimet destabilizuese kibernetike.