Forca e Sigurisë së Kosovës (FSK) ka dërguar një ekip në Gaza për të realizuar vlerësimin paraprak dhe përgatitjet për dislokimin e kontingjentit të saj në kuadër të misionit paqeruajtës të Forcës Ndërkombëtare Stabilizuese (ISF). Komandanti i FSK-së, Gjenerallejtënant Bashkim Jashari, ka autorizuar këtë ekip për të koordinuar aktivitetet dhe për të zhvilluar takime me autoritetet lokale dhe me Qendrën Koordinuese Civilo-Ushtarake (CMCC), në përputhje me Rezolutën 2803 të OKB-së. Gjatë këtyre takimeve janë diskutuar procesi i integrimit të kontingjentit të FSK-së, operacionet e përbashkëta dhe mbështetja logjistike, ndërsa Kuvendi i Kosovës dhe ushtruesja e detyrës së presidentes, Albulena Haxhiu, kanë miratuar dhe autorizuar dërgimin e trupave në mision. Kosova është një nga pesë shtetet e para që janë angazhuar në këtë mision në Gaza, ndërsa ende nuk është përcaktuar data e saktë e dislokimit apo numri i trupave që do të dërgohen.