Gjermania po përgatitet përballë rritjes së kërcënimeve nga sulmet me dronë dhe sulmet kibernetike, duke ndërmarrë masa të reja të forta mbrojtëse. Ministri i Brendshëm Alexander Dobrindt ka paralajmëruar ngritjen e njësive të posaçme që do të mbrojnë hapësirën ajrore mbi qytetet strategjike dhe do të neutralizojnë dronët me mjete shpërthyese. Përveç kësaj, kompanitë që menaxhojnë infrastrukturën kritike do të marrin kompetenca ligjore për të luftuar aktivisht këto kërcënime. Në kuadër të përforcimit të sigurisë kibernetike, qeveria planifikon krijimin e një rrjeti sensorësh digjitalë, Cyberdome, për të parandaluar sulmet kibernetike ndaj institucioneve dhe kompanive gjermane. Kjo nismë vjen pas tentativës së dështuar të sulmit me dron ndaj aeroportit Leipzig/Halle, që shërben si pikë kyçe për dërgimin e ndihmave ushtarake drejt Ukrainës, për të cilën qeveria gjermane ka fajësuar Rusinë.