Në vitin 2025, pothuajse gjysma e përdoruesve të internetit në 20 vende të Bashkimit Evropian janë përballur me mesazhe armiqësore, fyese dhe poshtëruese në rrjetet sociale, sipas të dhënave të Eurostat. Nivelet më të larta të ekspozimit ndaj gjuhës së urrejtjes janë regjistruar në Irlandë, Hungari, Finlandë dhe Sllovaki, ndërsa vendet si Letonia, Greqia, Gjermania dhe Lituania raportojnë nivele më të ulëta. Mesazhet armiqësore shënjestrojnë individë dhe grupe të ndryshme për shkak të bindjeve politike, origjinës etnike, orientimit seksual, fesë, gjinisë, moshës apo aftësive të kufizuara, ndërsa të rinjtë meshkuj janë grupi më aktiv në shpërndarjen e komenteve të tilla.