Forcat Ajrore të Turqisë kanë shënuar një moment historik me promovimin e koloneles Ozlem Karapinar në gradën e gjeneral brigade, duke u bërë kështu gruaja e parë në këtë pozicion që nga themelimi i ushtrisë ajrore turke. Ky vendim u mor gjatë mbledhjes së Këshillit të Lartë Ushtarak, e drejtuar nga presidenti Recep Tayyip Erdogan, ku u diskutuan edhe promovimet dhe pensionimet e tjera në radhët ushtarake. Karapinar, e cila ka shërbyer për shumë vite në Forcat Ajrore, do të mbajë edhe titullin tradicional “pasha”, që përdoret për gjeneralët dhe admiralët në Turqi. Në të njëjtën kohë, në pension doli komandanti i Forcave Ajrore, gjenerali Ziya Cemal Kadıoglu, duke shënuar kështu një ndryshim të rëndësishëm në komandën e ushtrisë ajrore turke.