Mekanizmi i Hagës ka refuzuar kërkesën e mbrojtjes së Ratko Mlladiq për lirimin e tij me qëllim trajtimin mjekësor në Serbi, pavarësisht gjendjes së rëndë shëndetësore të ish-komandantit serb. Djali i tij, Darko Mlladiq, ka bërë të ditur se arsyetimi i refuzimit është se ai ka akses në kujdesin më të mirë mjekësor në Hagë. Mlladiq, i cili ka pësuar një goditje në tru më 10 prill dhe vuante nga probleme të shumta neurologjike, kardiovaskulare dhe nefrologjike, u transferua më 2 maj në një spital civil në Hagë për trajtim të specializuar. Ai është dënuar me burgim të përjetshëm për gjenocid dhe krime kundër njerëzimit në Bosnje dhe Hercegovinë dhe që nga viti 2024 po merr kujdes paliativ në Hagë, ndërsa kërkesat e tij për lirimin e përkohshëm janë refuzuar disa herë.