Autoritetet gjermane kanë nisur një hetim për terrorizëm pas zbulimit të mjeteve shpërthyese në një nënstacion elektrik pranë termocentralit të Jänschwalde në lindje të vendit. Incidenti shkaktoi ndërprerje të shkurtër të furnizimit me energji, por linjat janë rikthyer tashmë në funksion dhe nuk ka persona të lënduar. Një tjetër incident i dyshuar si sabotazh u raportua në nënstacionin elektrik në landin Nordrhein-Westfalen pranë Këlnit, duke rritur shqetësimet për sulme të qëllimshme ndaj infrastrukturës kritike. Këto ngjarje vijnë në një kohë kur Gjermania akuzon Rusinë për fushatë të luftës hibride, përfshirë sulme me dronë dhe sabotazhe, ndërsa në Bruksel zhvillohen takime mes Komisionit Evropian dhe NATO-s për të adresuar kërcënimet e fundit në Evropë.