Kryeministri hungarez Viktor Orban ka vendosur një bllokadë totale ndaj Ukrainës duke ndaluar tranzitin e mallrave dhe karburanteve përmes territorit të Hungarisë. Ky vendim është marrë si kundërpërgjigje ndaj ndalimit të naftës ruse nga Kievi dhe pas arrestimit të disa zyrtarëve bankarë ukrainas në Budapest. Orban ka deklaruar se Hungaria nuk do të dorëzohet ndaj shantazheve dhe nuk do të mbështesë anëtarësimin e Ukrainës në Bashkimin Europian, duke theksuar se nuk do të lejojë asnjë tranzit derisa të rikthehet furnizimi me naftë ruse përmes tubacionit “Druzhba”. Ministri i Jashtëm ukrainas, Andrii Sybiha, ka akuzuar Budapestin për ndalimin e shtatë punonjësve të Bankës Shtetërore të Ukrainës, të cilët po transportonin një shumë të madhe parash dhe flori, duke kërkuar ndërhyrjen urgjente të Bashkimit Europian për këtë veprim që Kievi e konsideron të paligjshëm.