Irani dhe Shtetet e Bashkuara do të zhvillojnë më 26 shkurt në Gjenevë raundin e tretë të bisedimeve bërthamore, në përpjekje për të shmangur një konflikt ushtarak mes dy vendeve. Ministri i Jashtëm iranian, Abbas Araghchi, u nis nga Teherani për të takuar përfaqësuesit amerikanë, ndërsa ndërmjetësues do të jenë përfaqësuesit e Omanit. Bisedimet vijnë në një kohë kur presidenti amerikan Donald Trump po shqyrton mundësitë për veprim ushtarak nëse nuk arrihet marrëveshje për frenimin e programit bërthamor iranian, ndërsa SHBA-ja ka vendosur dy aeroplanmbajtëse pranë Iranit. Palët mbeten të ndara mbi çështjet kryesore, ku SHBA kërkon ndalimin e pasurimit të uraniumit dhe heqjen e rezervave, ndërsa Irani kërkon heqjen e sanksioneve dhe njohjen e të drejtës për pasurim bërthamor paqësor.