Përfaqësuesi i Iranit në OKB, Amir-Saeid Iravani, ka deklaruar se Teherani nuk do të qëndrojë duarkryq nëse presidenti amerikan Donald Trump zbaton kërcënimet e tij për "krime lufte". Ai ka cilësuar retorikën e Trumpit, ku paralajmërohej se "një qytetërim i tërë do të vdesë" nëse Irani nuk arrin një marrëveshje, si nxitje për krime lufte dhe potencialisht gjenocid. Gjatë një seance të Këshillit të Sigurimit të OKB-së mbi sigurinë në Ngushticën e Hormuzit, Iravani i bëri thirrje komunitetit ndërkombëtar që të kritikojë këto deklarata para se situata të përshkallëzohet. Ai theksoi se Irani do të ushtrojë të drejtën e tij të vetëmbrojtjes dhe do të marrë masa reciproke të menjëhershme dhe proporcionale në rast nevoje. Ndërkohë, një draftrezolutë për sigurinë në Ngushticën e Hormuzit është bllokuar nga Rusia dhe Kina me veto.