Izraeli dhe Libani pritet të zhvillojnë bisedime të drejtpërdrejta në ditët në vijim, të parat që nga përshkallëzimi i konfliktit pas luftës me Iranin. Në këto negociata, që mund të mbahen në Paris ose në Qipro, do të përfshihen edhe përfaqësues amerikanë, ndër ta Jared Kushner, dhëndri i presidentit amerikan Donald Trump. Delegacionin izraelit do ta udhëheqë Ron Dermer, mik i kryeministrit Benjamin Netanyahu. Fokus i bisedimeve do të jetë ndalimi i luftimeve në Liban dhe çarmatosja e grupit të armatosur libanez Hezbollah, i cili ka shkaktuar qindra viktima dhe ka zhvendosur mijëra civilë pas sulmeve të fundit ndaj Izraelit. Konflikti nisi më 2 mars kur Hezbollah hapi zjarr për hakmarrje ndaj vrasjes së udhëheqësit suprem iranian, duke çuar në një fushatë të gjerë bombardimesh nga Izraeli dhe shkaktuar një krizë humanitare në rajon.